特賣會情報站

【on.cc東網專訊】 百物騰貴，經濟又話會變差，想又食、又買，又可以慳錢，就要把握機會喇！今個星期喺葵涌運動場會有食品嘉年華，場內提供8項$1震撼價優惠，包括養生湯包、花菇等等，更有參展商以低至3.5至4折發售人氣法國鑄鐵鍋同刀座套裝，幾千蚊嘅高麗參都有買一送一優惠，貨品每日限量發售，呢個時勢去掃貨，可以慳返唔少。

中華廠商會聯合會由10月31日至11月8日在葵涌運動場舉行「第四屆香港食品嘉年華」，主題係健康飲食與生活。活動總共有8間參展商推出$1產品優惠，部分原價高達$180。 「啲湯包都係精心挑選，適合而家天氣飲嘅靚湯。」有份推出$1優惠嘅參展商負責人崔先生表示，公司會喺逢周六、日推出1蚊養生湯包，原價$180，內有5包適合而家氣候飲嘅湯料，只要加啲瘦肉即可煲出滋潤養生湯水。由於每日只限20份，想買嘅市民記得一入到去就去攤位嘅排隊區拎籌購買。如果搶唔到，攤位仲有原價近$4000嘅高麗參買一送一優惠，每日限售50份。 除咗滋補食品，連人氣法國鑄鐵鍋都好抵買。「近年市民對廚具嘅品質同外型要求愈嚟愈高，亦好捨得使錢。」另一參展商負責人羅先生話，今次活動會以4折價$999，發售一款18厘米（容量約1.7升）嘅圓形燉鍋，仲有5隻顏色揀。佢仲話，18厘米嘅鍋最適合拎嚟整煲仔飯，啱晒天氣轉凍嘅時候用，煮完煲仔飯直接上枱，真係入得廚房，出得廳堂咁話喎。今次又推出德國著名品牌刀座套裝，不但以3折價出售，仲附送一個價值約$2000嘅砧板。鑄鐵鍋同刀座套裝都係每日限量30個，想要嘅記得早啲入場喇！ 另外，今次同時有逾50間展商推出低至1折嘅優惠價促銷。除咗食品，場內仲有專賣餐具嘅區域，以極抵價錢買到各種優質廚具。而嘉年華嘅開放時間係上午11點到晚上7點半，最後一日仲會提早至晚上6點半結束。入場費每位$5，而身高1米或以下小童、65歲或以上長者及殘疾人士就可以免費入場。每位持券入場人士都可以參加大抽獎，有機會贏取總值3萬蚊嘅獎品。如果買咗太多嘢驚拎唔到返屋企，大會仲會提供送貨服務，包保你買幾多都冇問題啦！